Белата куќа: Американски адмирал нареди напад врз венецуелски брод

Белата куќа потврди дека високиот адмирал на американската морнарица, Френк Бредли, издал наредба за втора рунда удари врз наводен венецуелски брод за транспорт на дрога, пренесе Би-Би-Си.

Портпаролката на Белата куќа, Каролина Левит, изјави во понеделникот дека секретарот за одбрана, Пит Хегсет, ги одобрил ударите, но не наложил „елиминација на сите лица“ на целта.

„Адмирал Бредли постапуваше во рамки на своите овластувања и во согласност со законот кога нареди дополнителен удар“, рече Левит.

Од почетокот на септември, повеќе од 80 лица загинале во низа слични напади во Карипското Море.

Администрацијата на Трамп наведува дека делува во самоодбрана, уништувајќи пловни објекти за кои се тврди дека превезуваат нелегална дрога кон САД.