Зеленски рече кои три теми се најчувствителни во преговорите за завршување на војната

Претседателот на Украина, Володимир Зеленски, рече дека крајот на војната нема да дојде брзо или, пак, едноставно и нагласи дека никаква одлука за иднината на земјата не може да се донесе без директно учество на Киев.

Неговата изјава доаѓа во време на интензивни разговори за можни рамки за мировен договор, при што САД, европските сојузници и други земји се обидуваат да изградат пат кон завршување на конфликтот.

„Нема да има едноставни решенија за завршување на оваа војна. Разбираме што се случува. Разбираме со кого си имаме работа. Проблемот не е тешкотијата во донесувањето одлуки. Јас сум способен да ги донесам. Важно е сè да биде фер и транспарентно. Да не се случува ништо зад грбот на Украина. Да не се одлучува ништо без Украина, за нас, за нашата иднина“, напиша Зеленски на X.

Тој нагласи дека три теми се особено чувствителни: територија, замрзнати руски средства и безбедносни гаранции.

„Не можам да зборувам во име на европските лидери за замрзнатите пари во Европа. Можам само да го искажам мојот став, а тие можат да го поддржат. А што се однесува до безбедносните гаранции, сметаме на силни гаранции од САД и Европа, како и од некои други земји. Тоа е една од темите на Коалицијата на волјата. Работиме на тоа. Мислам дека тие три прашања се најчувствителни и најважни. Нашите тимови ќе продолжат да работат на нив“, рече украинскиот претседател.

Мировните разговори во последните недели се водеа во повеќе формати, вклучувајќи дипломатски консултации со Вашингтон и клучните европски престолнини.

Целта е да се создаде рамка што би можела да го отвори патот за договор, но споровите остануваат големи, од статусот на окупираните територии до тоа кој ќе го надгледува спроведувањето на евентуалното примирје и под кои услови. Украина инсистира дека секој договор мора да го почитува нејзиниот територијален интегритет и да вклучува конкретни, применливи безбедносни гаранции.

Пораката на Зеленски е насочена и кон сојузниците и кон јавноста: Украина е подготвена да разговара, но не и да се согласи на решенија што би го загрозиле нејзиниот суверенитет на долг рок. Според него, ниеден мировен план нема да биде одржлив ако во него не се вклучени јасни механизми за заштита на земјата, вклучувајќи го и прашањето за идната одбрана и користењето на замрзнатите руски средства за реконструкција.