Skip to content
Албанија и Иран повторно влегоа во остра политичка фаза откако албанскиот премиер Еди Рама најави дека следната недела парламентот во Тирана ќе гласа за резолуција со која Исламската Република Иран би била прогласена за државен спонзор на тероризмот, додека во меѓувреме шефот на пратеничката група на социјалистите, Таулант Бала, веќе го поднесе предлогот во Собранието. Наместо за веќе изгласана одлука, како што првично се пренесуваше во дел од медиумите, станува збор за нацрт-резолуција што допрва треба да оди на усвојување.
Според содржината што ја објавија албанските медиуми, документот не се задржува само на политичка осуда на Техеран, туку предвидува и Иранската револуционерна гарда да биде означена како терористичка организација, а во дел од извештаите и Хезболах е наведен во истиот пакет мерки. Во нацртот се спомнуваат и кибернападите врз албанските институции, вклучително и нападот од 2022 година врз државната инфраструктура, како и поновите обиди за упад во системите на албанскиот парламент.
Овој чекор доаѓа по неколкугодишно заострување на односите меѓу Тирана и Техеран. Албанија уште во септември 2022 година ги прекина дипломатските односи со Иран, обвинувајќи го за масовни кибернапади врз владината инфраструктура, а новата резолуција сега го крева спорот на повисоко политичко и меѓународно ниво. Според албанските извори, по евентуалното усвојување, текстот треба да им биде доставен и на албанската влада, на сојузничките земји, како и на меѓународни институции, меѓу нив Обединетите нации и Европската Унија.