Skip to content
Претседателот на СДСМ, Венко Филипче, на денешната прес-конференција оцени дека политичките промени во Унгарија испраќаат силна порака и до Македонија и до целиот регион, порачувајќи дека Балканот треба да остане на европскиот курс. Неговата изјава доаѓа два дена откако во Унгарија опозициската Тиса на Петер Маѓар го порази Виктор Орбан и стави крај на неговото 16-годишно владеење.
Филипче рече дека резултатот во Унгарија претставува, како што наведе, „историска победа на демократијата над автократијата“, оценувајќи дека тоа е сигнал дека „времето на автократите завршува“. Во обраќањето тој порача дека „регионот припаѓа на Европа, а не на Русија“, додавајќи дека пораката од Унгарија се однесува на целиот регион и дека по Орбан, според него, политички промени ќе следат и во Србија, а потоа и во Македонија.
Во истото обраќање, лидерот на СДСМ ја обвини Владата дека стратешките интереси на државата ги врзала за кругови блиски до Орбан и најави дека неговата партија ќе бара целосна истрага за, како што рече, договорите и бизнис-врските што, според опозицијата, се поврзани со медиумите, телекомуникациите, енергетиката и други сектори.
Од ВМРО-ДПМНЕ ги отфрлија ваквите обвинувања и возвратија дека станува збор за официјална меѓудржавна соработка, а не за тајни бизнис-врски. Пратеникот Бране Петрушевски денеска изјави дека СДСМ наместо да се занимава со изборни резултати во други држави треба да се посвети на состојбата во сопствената партија, додека премиерот Христијан Мицкоски ги оцени тврдењата на опозицијата како „лаги и конструкции“.