Skip to content
Претседателката Гордана Сиљановска-Давкова упати остра критика кон предлогот што Министерството за култура и туризам, во периодот кога со него раководеше Зоран Љутков, го доставило до Владата – Струшките вечери на поезијата да го загубат статусот на самостојна национална установа и да станат сектор во Центарот за култура „Браќа Миладиновци“ во Струга. За претседателката, таквата идеја е „трагедија“ и показател за неразбирање на значењето на културата.
Сиљановска-Давкова вчера во Струга рече дека била шокирана кога дознала за предлогот, оценувајќи дека Струшките вечери на поезијата не можат да се третираат како обична административна единица.
Таа потсети дека фестивалот повеќе од шест децении е еден од најпрепознатливите македонски културни брендови во светот и дека има улога која далеку ги надминува рамките на една локална културна институција.
„За мене тоа е трагедија“, рече претседателката, додавајќи дека СВП претставува светска промоција на македонската култура, идентитет и културна дипломатија. Таа оцени дека намалувањето на институционалниот статус на фестивалот би било спротивно на неговото шест и пол децениско значење.
Особено остар беше нејзиниот коментар дека ваква иницијатива дошла токму од Министерството за култура.
Според Сиљановска-Давкова, би било разбирливо ваква идеја да произлезе од институција која нема директна врска со културата, но кога доаѓа од ресорното министерство, тоа за неа е „целосно неразбирливо“. Таа додаде дека во таков случај се поставува прашањето дали „оние во културата разбираат што е култура“.
Претседателката, која е и покровителка на Струшките вечери на поезијата, смета дека државата треба да оди во спротивна насока – да го зајакнува фестивалот финансиски, инфраструктурно и програмски.
Наместо сведување на СВП на дел од поголема административна структура, таа очекува институцијата да добие поддршка за дигитализација, нов простор, нови проекти и понатамошен меѓународен развој.
Сиљановска-Давкова го нагласи и меѓународното значење на фестивалот, потсетувајќи дека Струшките вечери на поезијата добиле признание од УНЕСКО и дека нивното постоење и углед имаат тежина и во европските интеграциски процеси на земјата.
Предлогот за реорганизација, сепак, не бил прифатен.
Директорот на Струшките вечери на поезијата, Никола Кукунеш, за САКАМДАКАЖАМ.МК изјави дека иницијативата на тогашниот министер Зоран Љутков во јуни не поминала на владината Комисија за култура. И покрај тоа, раководството на фестивалот ја доживеало самата идеја како сериозен удар врз институцијата.
Кукунеш нагласи дека националните установи како СВП имаат функција на „уметнички амбасадори“ и се дел од столбовите врз кои се потпираат македонскиот идентитет и јазик. Според него, ваквите институции треба да се унапредуваат, а не да се сведуваат на пониско организациско ниво.
Струшките вечери на поезијата годинава го одбележуваат своето 65. издание. На отворањето во јуни, Сиљановска-Давкова го опиша фестивалот како место кое шест и пол децении ги поврзува светските поетски гласови и ја промовира Македонија преку културата.
Нејзината вчеташна реакција затоа е и директна порака до институциите: наместо административно намалување на статусот на Струшките вечери на поезијата, претседателката бара државата дополнително да го зајакне фестивалот како еден од највидливите македонски културни брендови во светот.
