Skip to content
СДСМ го критикува Орце Ѓорѓиевски за начинот на кој Град Скопје се справува со комарците во период кога западнонилската треска се шири во главниот град. Од партијата велат дека градоначалникот набројува датуми кога било прскано, но не одговара на клучното прашање, зошто Скопскиот регион стана центар на епидемијата и дали спроведените мерки биле доволно ефикасни. Заклучно со 18 август во Македонија се регистрирани 38 случаи, 37 од нив во Скопскиот регион, како и четири смртни исходи.
Реакцијата на СДСМ следува по јавниот настап на Ѓорѓиевски, кој ги отфрли обвинувањата дека Градот задоцнил со дезинсекцијата и објави календар со досега спроведените третмани против ларви и возрасни комарци.
Од СДСМ прашуваат дали самото набројување на датумите е доволен доказ дека заштитата функционирала.
„Ако прскањето од 7 мај било толку успешно, зошто токму Скопје е епицентар?“, прашуваат од партијата. Според СДСМ, потребно е да се утврди дали третманите биле навремени, дали биле опфатени сите потенцијални жаришта и дали нивната ефикасност била соодветно контролирана.
Последните здравствени податоци даваат дополнителна тежина на овие прашања. Од вкупно 38 регистрирани случаи на западнонилска треска, 36 се потврдени, а два се водат како веројатни. Дури 37 случаи се од Скопскиот регион, додека еден е од Велес. Регистрирани се и четири смртни случаи кај пациенти со невроинвазивна форма на болеста.
Ѓорѓиевски, пак, тврди дека нападите од СДСМ се обид сериозна здравствена тема да се претвори во политичка пресметка.
Тој наведува дека годинава активностите против комарците започнале уште на 7 мај и посочува повеќе авионски и теренски третмани во мај, јуни, јули и август. Според неговата реакција, дезинсекцијата се спроведува согласно годишната програма, законските обврски и елаборатот на Центарот за јавно здравје Скопје.
Официјалните податоци на Град Скопје потврдуваат дека до крајот на јули биле извршени повеќе третмани против ларви и возрасни комарци. На 7 мај започнала авионска дезинсекција против ларви, а во следните месеци биле спроведувани дополнителни авионски и теренски третмани. За 20 и 21 август е најавена нова авионска дезинсекција.
Токму тука СДСМ ја насочува критиката кон Ѓорѓиевски. Партијата не спори дека имало прскање, туку бара одговор дали третманите го постигнале очекуваниот ефект, особено откако бројот на заболени во Скопје продолжи да расте.
Од СДСМ бараат информации за тоа кои локации се идентификувани како жаришта, дали е измерена ефикасноста на спроведената дезинсекција и дали граѓаните биле навремено информирани за зголемениот ризик.
„СДСМ нема да молчи за јавното здравје. Бараме одговор, не сензација“, наведуваат од партијата.
Ѓорѓиевски возврати дека јавното здравје не се штити со создавање страв и политички сензации и најави дека Градот ќе продолжи со третманите согласно стручните препораки и утврдената динамика.
