Skip to content
Спасувачките екипи во Украина ги пребаруваат урнатините на трговски центар во Кривји Рог, кој вчера беше погоден во разорен руски напад со беспилотни летала. Во нападот врз преполниот центар, 16 лица загинаа, а 130 беа повредени, додека девет лица сè уште се водат како исчезнати. Нападот беше извршен во два брана, тактика позната како „двоен допир“, пишува Би-Би-Си.
Украинскиот претседател Володимир Зеленски рече дека нападот бил „циничен и неуспешен“ и дека вториот удар бил насочен кон спасувачите кои веќе биле на терен. Руската армија не коментираше за настанот во Кривји Рог, родниот град на претседателот Зеленски. Во меѓувреме, локалните власти известуваат дека најмалку уште две лица се убиени во нови руски напади рано денес. Министерството за одбрана во Москва соопшти дека нивни цели биле транспортната инфраструктура и магацините.
Шефот на регионалната воена администрација, Олександр Ханжа, потврди дека меѓу повредените во регионот Дњепропетровск има 23 деца. Тој рече дека бројот на жртви се искачил на 16 откако уште едно тело беше извлечено од урнатините во текот на ноќта. Според него, 29 лица се во сериозна состојба, па затоа постои страв дека бројот на жртви може да се зголеми.
„Бевме нападнати од животни“
Спасувачки екипи од четири други украински региони беа итно испратени за да помогнат во потрагата по преживеани. Градоначалникот на Кривји Рих, Олександр Вилкул, рече дека руските беспилотни летала летале на „екстремно ниски височини“ и ги нарече напаѓачите „животни“.
„Има исчезнати лица кои не се јавуваат на повиците“, додаде тој. Друг дрон се урна во трговски центар кој веќе беше во пламен. Додека потрагата продолжуваше во Кривји Рих, властите во Киев објавија дека едно лице загинало во пожар во магацин по тревога за балистичка ракета.
Во Запорожје на југот од земјата, најмалку еден човек е убиен, а четири лица се повредени во напад од руски дрон, објави шефот на регионалната воена администрација, Иван Федоров. Четири лица, меѓу кои три деца, беа убиени во одделни руски напади вчера во Николаевската област на југот од земјата.
Пред три дена, 17 лица загинаа во Киев
Уште две лица беа убиени во Харковската област на североисток, според локалните власти. Еден ден претходно, во четврток, 17 лица беа убиени, а повеќе од 40 беа повредени во голем ракетен и беспилотен напад врз Киев. Украинската војска вчера објави дека извршила напади врз рафинерија за нафта и воен аеродром длабоко на руска територија.
Во последните месеци, Украина ги засили нападите врз руските енергетски капацитети, како и врз објекти како што е магацинот на најголемата онлајн продавница во Русија, Wildberries. Киев ги смета овие објекти за легитимни цели.
Имено, тие помагаат во финансирањето на руската војна. Рускиот претседател Владимир Путин започна инвазија на Украина во февруари 2022 година. Москва моментално контролира околу една петтина од украинската територија на југоистокот од земјата.
