Реката Сава се повлече и го откри „Титаникот“ што го криеше 81 година

Необично нискиот водостој на Сава откри глетка што ретко може да се види во вакви размери. Кај Сремска Митровица од водата повторно се појави огромната метална конструкција на паробродот „Словенац“, познат меѓу локалното население како „Савскиот Титаник“. Бродот потонал во последните денови од Втората светска војна и веќе 81 година лежи на дното на реката.

Делови од бродот биле видливи и при претходни периоди со низок водостој, но жителите велат дека не паметат кога последен пат бил откриен толку голем дел од конструкцијата. Околу остатоците сега се појавил и голем песочен нанос, па до делови од некогашниот брод може да се стигне и пеш.

Зад необичната глетка се крие приказна стара повеќе од еден век.

„Словенац“ бил изграден во Будимпешта во 1913 година, во времето на Австроунгарија, а првично го носел името „Ваг“. Станувало збор за парен влекач со плиток газ, приспособен за работа на големите реки.

По Првата светска војна, бродот преминал во сопственост на Кралството на Србите, Хрватите и Словенците, а во 1921 година го добил името „Словенац“.

Неговата најбурна историја започнала за време на Втората светска војна. Бродот бил под германска контрола, а по ослободувањето на Белград повторно бил вратен во служба на југословенските сили. Се користел за превоз на воен материјал, а со баржи превезувал и ранети војници.

Неколкупати бил оштетуван и повторно оспособуван за пловидба.

Но последното патување го имал во април 1945 година, непосредно пред крајот на војната.

Додека пловел по Сава, „Словенац“ налетал на германска мина. Експлозијата била толку силна што трупот практично бил скршен, а бродот потонал. Според повеќе историски извори што деновиве ја пренесуваат приказната, несреќата се случила на 24 или 25 април 1945 година, во реонот недалеку од Сремска Митровица.

Остатоците никогаш целосно не биле извадени од реката.

Низ децениите Сава ги покривала, а при исклучително ниски водостои делови од бродот повторно излегувале над површината. Ова лето, поради долгиот сушен период и ниското ниво на реката, откриен е значително поголем дел од конструкцијата.

Денес глетката е речиси надреална. Таму каде што вообичаено има вода, се појавиле песок и остатоци од брод стар 113 години, а околу него локалните жители веќе користат мало песочно пространство за престој покрај реката.

Но „Словенац“ не е само необична туристичка атракција. Тој е остаток од период во кој Сава била важен воен и транспортен коридор и сведоштво за последните недели од Втората светска војна на овие простори.

Нискиот водостој годинава само повторно ја извади таа приказна на површината.