Skip to content
Денес сè повеќе луѓе користат кокаин, а оваа дрога се произведува повеќе од било кој период од историјата, се наведува во извештај на Обединетите нации. Во неодамна објавениот Светски извештај за дрогите за 2023 година, откриено е дека 22 милиони луѓе користеле кокаин во 2021 година, во однос на 21 милион во претходната година. Одгледувањето на кока скокна од 234.200 хектари во 2020 година на 315.000 хектари во 2021 година.
„Светот доживува големо зголемување на понудата и побарувачката на кокаин, што сега се чувствува низ целиот свет и веројатно ќе го поттикне развојот на нови пазари надвор од традиционалните граници“, се вели во извештајот.
Сепак, во извештајот се вели дека заплените на кокаин го надминале растот на производството, со 2.026 тони запленети во 2021 година, така што вкупната количина на кокаин достапна за потрошувачите сè уште била малку помала отколку во средината на 2000-тите. Сепак, производството постојано се зголемува од 2015 година.
Додека Америка и Западна и Централна Европа продолжуваат да доминираат на пазарот, употребата на кокаин рапидно расте во Африка, Азија и Југоисточна Европа, се вели во извештајот.
„Вклучените криминални актери, вклучително и групите кои произведуваат и оние кои организираат трговија до конечните дестинации, се диверзифицираа според динамиката на конкуренцијата, специјализацијата и соработката, што на крајот доведе до поефикасни синџири на снабдување“, се вели во извештајот на ОН.
Шверцерите сè повеќе шверцуваат база на кокаин така што го раствораат во пластични и јаглеродни предмети, каде што е многу потешко да се открие. Тие имаат се повеќе „супер лаборатории“ во Европа каде што ја извлекуваат базата на кокаин од овие материјали и ја претвораат во прав.
Лоран Ланиел, главен научен аналитичар во Европскиот мониторинг центар за дроги и зависности од дрога, вели дека скенерите, рендгенските снимки и дресираните кучиња обично не можат да откријат кокаин шверцуван на овој начин.
Тој, исто така, рече дека дилерите хемичари можат да користат одредени хемикалии за да ја „заклучат“ базата на кокаин во производите, што го оневозможува преземањето на дрогата без информација која хемикалија треба да се користи за да ја одвои од супстанцијата во која е шверцувана.
Според Светскиот извештај за дрога, производството на метамфетамин исто така расте на традиционалните пазари во Источна и Југоисточна Азија и во САД, а лаборатории се откриени во Југозападна Азија, Јужна Азија и Африка.
Извор: VICE
