Skip to content
Претседателот на СДСМ, Венко Филипче, изјави дека е мета на долготрајна црна кампања од страна на ВМРО-ДПМНЕ, нагласувајќи дека власта наместо реални резултати нуди само дезинформации и медиумски спинови.
„Јас сум предмет на црна кампања на ВМРО-ДПМНЕ повеќе години наназад,“ рече Филипче во интервју за телевизија Сител, коментирајќи ги нападите околу неговиот приватен одмор.
Тој потсети дека низ годините бил цел на бројни обвинувања без основа:
„Прво ми препишуваа некаква куќа во Нерези, па авиокомпанија во Дубаи, па стокатница во Дубаи, па сега еве јахта… Нема да се изненадам ако зимава застанат и се сликаат пред некоја куќа во Сент Мориц и кажат дека е моја.“
Филипче посочи дека владејачката гарнитура нема што да понуди на граѓаните, па поради тоа прибегнува кон напади врз опозицијата.
„Немаат што да прават друго, поради тоа што апсолутно нема никаков перформанс во владата. Немаат со што да се пофалат, ги демонтираме во сите мерки и бројки,“ нагласи тој.
Во продолжение лидерот на СДСМ предупреди дека граѓаните веќе ги чувствуваат последиците од „неспособноста на власта“, како што ја нарече: раст на цените, поскапени основни трошоци, економски слабости и недостиг на визија.
„Сметам дека оваа влада ќе оди во историјата како една фуснота, затоа што буквално ништо нема да направат,“ истакна Филипче.
Тој заклучи дека Социјалдемократскиот сојуз ќе продолжи да се насочува кон решавање на реалните проблеми на граѓаните:
„Црните кампањи нема да го променат фактот дека граѓаните живеат сè потешко – и тоа е директен резултат на неспособна, расипничка и конфузна власт.“
