На истекот на древниот Дрим заврши поетскиот пој во Струга

Со традиционалното меѓународно читање „Мостови“ на Мостот на поезијата во Струга и врачување на највисоките фестивалски признанија, вечерва (24 август) заврши 64-тото издание на Струшките вечери на поезијата. Во завршниот ритуал, фестивалската публика ги испрати гостите-поети со аплауз и со симболичниот поетски мост над истекот на Дрим.

Наградата „Златен венец“ годинава ќе му биде врачена на поетот Жан Пјер Симеон. Признанието „Браќа Миладиновци“ за најдобра поетска книга меѓу две фестивалски изданија оди кај Јулијана Величковска за „Рајсфершулс“, додека „Мостови на Струга“ – за најдобар поет-дебитант во соработка со УНЕСКО – му припаѓа на Матеуш Шимчиќ (Полска) за „Потребни се извори“. По завршувањето на читањето „Мостови“ ќе биде објавен и добитникот на наградата „Енхалон“.

Во рамките на завршниот ден во древниот град на поезијата Струга се одржа и традиционалниот излет со брод до манастирот „Св. Наум“, со поетско читање на брегот на езерото. Поетите дегустираа вина на „Тиквеш“, а на бродот беше врачена и специјалната награда „In vino veritas“ за најдобра песна инспирирана од виното.

Ова издание беше отворено во четвртокот со палење на фестивалскиот оган и садење дрвце во Паркот на поезијата во чест на лауреатот, како и со низа промоции, читања и разговори кои ги обединија домашните и меѓународните автори. Покровител на манифестацијата е претседателката на Република Македонија, Гордана Силјановска Давкова, а фестивалот е финансиран од Министерството за култура и туризам.

Со симболиката на мостот, Струга и годинава ја потврди улогата на поетски град кој ги спојува културите и јазиците – таму каде што зборот повторно ги поврза бреговите на Охридското Езеро и древниот Дрим.