Skip to content
Како дел од проектот „Бистро-матно“ на „Транспаренси Интернешнл – Македонија“, организацијата ги објави најматните и најбистрите настани за декември. На врвот на листата на „матни“ настани се најдоа Артан Груби, поранешен вицепремиер, и судијата Енвер Беџети, кои се вметнати на „црната листа“ на Стејт департментот.
Според соопштението на американскиот Стејт департмент, Груби и Беџети биле вмешани во значителна корупција, вклучително и примање мито за уривање судски процеси против Сашо Мијалков, поранешен директор на УБК. Груби, заедно со членови од неговото најтесно семејство, и Беџети, со оваа одлука добија забрана за влез во САД, а нивните визи ќе бидат поништени.
Како втор „матен“ настан се издвојува случајот со Цвета Ристовска, членка на Антикорупциската комисија, која водеше предмет за директорот на АНБ, Бојан Христовски. Иако Ристовска била дел од наставниот кадар на универзитетот каде Христовски ја стекнал оспорената диплома, Универзитетот „Скопје“ ја тргна и подоцна врати нејзината слика на својата веб-страница.
Третиот настан е отпочнување постапка против осум лица за злоупотреби при јавни набавки во Дирекцијата за ТИРЗ, што е резултат на ревизорските извештаи од Државниот завод за ревизија.
Меѓу матните настани е и анализата на Центарот за граѓански комуникации, која укажува на слабото користење на податоците од регистарот на вистински сопственици за борба против корупцијата и перењето пари.
Од „бистри“ настани, „Транспаренси“ ги издвојува кривичните пријави против 24 лица за оштетување на буџетот за над 1,5 милиони денари, обвинението против пратеникот Пеце Милевски за исплати во период на загуби на „Водовод“, и кривичните пријави за поранешни директори на Фондот за иновации, Коста Петров и Фестим Халили, за злоупотреба на службена положба.
„Транспаренси Интернешнл – Македонија“ продолжува да ја следи состојбата со корупцијата и да ги информира граѓаните за најзначајните случаи.
