Skip to content
Студентот на Факултетот за организациски науки (ФОН) во Белград, Лазар Стојаковиќ, бил поканет на информативен разговор од страна на Безбедносно-информативната агенција (БИА).
На Инстаграм, Стојаковиќ ја нарече поканата притисок врз студентите. Тој изрази надеж дека државата ќе одговори на нивните барања преку институции, „а не преку тајната служба“.
Според ТВ Н1, инспектор на БИА стапил во контакт со таткото на Стојаковиќ, пренесувајќи порака дека неговиот син треба да дојде на „пријателски разговор“ со родителите, поради неговото учество во студентските блокади и протести.
Пленумот на ФОН потврди дека Стојаковиќ, придружуван од адвокат, одговорил на повикот и се појавил во полициската станица во Нов Белград. Сепак, по 40 минути чекање, му било соопштено дека средбата е одложена.
Пленумот остро го осуди потегот на агенцијата, нагласувајќи дека тоа „сериозно ја загрозува слободата на изразување“.
Протестите во Србија продолжуваат, при што околу 80% од факултетите се во студентска блокада – најголемата од ваков вид во земјата и последните 30 години во Европа. Студентите бараат објавување на целата документација за реконструкцијата на железничката станица во Нови Сад, каде што на 1 ноември загинаа 15 лица, како и кривично гонење на одговорните.
