Фондацијата „Заев – Едно општество за сите“, брендот „Мамас“ и компанијата „Тотал Инжинеринг“, испратија хуманитарна помош за турскиот народ наменета за граѓаните од регионите погодени од катастрофалниот земјотрес, објави на својот Фејсбук профил поранешниот премиер Зоран Заев.
Станува збор за 22 тони разновидна конзервирана храна, која, со обезбеден донаторски транспорт (камион-шлепер) од „Сакаов транс“ – Струмица, е испратена до градот Едрене, од каде ќе биде дистрибуирана до погодените подрачја.
– Сочувствуваме со нашите пријатели, особено со семејствата кои изгубија свои ближни и останаа без своите домови. Се молиме за сите кои поминаа низ агонијата, а на повредените во земјотресот им посакуваме побрзо оздравување и враќање во нормалните текови на живеење, пишува на социјалната мрежа поранешниот претседател на Владата Зоран Заев.
Во време на солидарност треба Заев пишува дека треба „да останеме луѓе, да останеме пријатели, и никогаш, ама баш никогаш и никаде низ светот, да не се случи тоа што се случи на турскиот и сирискиот народ“.
Во својата порака на социјалната мрежа поранешниот претседател на Владата Зоран Заев изразува јавна благодарност до вработените во турската амбасада во Република Северна Македонија, за одличната соработка и помошта околу спроведувањето на сите процедури, неопходни за непречено испраќање на хуманитарната помош.
