Храната во светот поевтинува, но во Македонија цените растат

Премиерот Христијан Мицкоски денеска изјави дека македонските институции редовно ги следат цените на прехранбените производи и најави силна реакција ако дојде до повторно „несакани појави“ во смисла на покачени цени. Сепак во земјава се купува прескапа храна, тврдат граѓаните. Иако Мицкоски ги обвини трговците дека успеваат не преку иновации, туку преку зголемување на цените да постигнат успеси, големо влијание има и работењето на инспкторатите кои проверката на цени ја прават само кампањски.

Бидејќи земјава е увозно зависна, големо влијание имаат и цените на светските берзи, но таму ситуацијата е различна. Според податоците на Агенцијата на ОН за храна и земјоделство (ФАО), цените на храната бележат пад во декември 2024 година. Индексот на цените на основните прехранбени производи на ФАО опаднал за 0,5% во однос на ноември, а на годишно ниво има намалување за 2,1%.

Особено забележително е поевтинувањето на шеќерот, кој во декември падна за 5,1%, благодарение на подобрените жетвени прогнози. И цените на млекото и млечните производи, како и растителните масла, се пониски во декември, додека месото порасна за 0,4% во истиот месец.

Спротивно на глобалната тенденција, цените на храната во Македонија продолжуваат да растат, а сето тоа е на товар на граѓаните.