Инфлацијата во февруари 5% – најмногу поскапела храната

Годишната инфлација во февруари изнесува 5%, покажуваат податоците на Државниот завод за статистика. Ова претставува континуиран раст на инфлацијата во последните неколку месеци. Во однос на јануари 2025 година, цените се зголемиле за 0,5%.

Најголемо поскапување е забележано во категоријата храна и безалкохолни пијалаци – 1,4% месечно и 6,6% годишно. Значително зголемување на годишно ниво има и во рестораните и хотелите, каде цените се зголемени за 12,2%, додека на месечно ниво растот е 0,6%.

Највисоко годишно поскапување од 19,2% е измерено кај кафето, чајот и какаото. „Млеко, сирење и јајца“ се поскапени за 8,1%, зеленчукот за 8,7%, зејтинот и маслата за 13,1%, месото за 6,5%, а овошјето за 4,5%.

Рибата и морските плодови се единствените прехранбени производи со поевтинување, од -1%.

На месечно ниво, најголем раст на цените е забележан кај месото (2,4%) и овошјето (2,1%).

Хотелското сместување бележи минимален пад од -0,1% на месечно ниво, но на годишно ниво цените се повисоки за 36,9%.

Цените на угостителските услуги во февруари пораснале за 0,8% месечно и 7,5% годишно.