Над 63.000 денари му требаат на четиричлено семејство за да го преживее февруари

Минималната синдикална кошница за февруари достигнува 63.773 денари, зголемена за 521 денар во однос на јануари

Минималната синдикална кошница за февруари 2025 година изнесува 63.773 денари, што претставува зголемување од 521 денар во однос на јануари, кога изнесуваше 63.252 денари.

За домаќинствата што живеат во изнајмен стан од 60 квадратни метри, минималната кошница изнесува 79.148 денари, како што објави Сојузот на синдикати на Македонија (ССМ).

Според пресметките на ССМ, за храна и пијалаци едно четиричлено семејство треба да одвои 23.427 денари, што е 36,7% од вкупната сума, додека за облека и обувки се потребни 5.800 денари (9,1%). За станарина, вода, електрична енергија и греење ќе се потрошат 6.096 денари или 9,6% од кошницата.

На трошоците за лична хигиена и одржување на хигиената во домот ќе се одвојат 2.195 денари (3,4%), а за здравје 1.135 денари (1,8%). За транспорт се потребни 4.844 денари (7,6%).

На комуникации ќе се потрошат 3.417 денари (5,4%), за рекреација и култура 4.592 денари (7,2%), а за образование 7.036 денари (11%). За ресторани и хотели ќе бидат потребни 4.131 денари (6,5%), додека за други стоки и услуги 1.100 денари (1,7%).

За домаќинства што живеат во изнајмен стан, дополнително ќе бидат потребни 21.471 денар.