Порфириј веќе не е адресата за целосната автокефалност на МПЦ-ОА, туку Вартоломеј во Цариград

Српскиот патријарх Порфириј денес ќе присуствува на Свечената Светосавска академија, националниот празник на српската заедница во Република Северна Македонија, што во организација на Српскиот културен центар „Спона“, ќе се одржи во Македонскиот народен театар.

Посетата на српскиот патријарх Порфириј на Македонија, некои медиуми и познавачи на црковните односни во православната заедница, ја оценија и како можност за разгледување на напредокот на Македонската православна црква – Охридска архиепископија во процесот на добивање целосна автокефалност.

Но, познавачот на црковните прашања Бранко Ѓорѓевски, во изјава за ТВ Телма, е во право кога вели дека процесот на автокефалност не е завршен, и покрај томосот што беше издаден од Српската православна црква пред три години.

Имено, целосната автокефалност на МПЦ-ОА останува отворено прашање и понатаму зависи од согласноста на Вселенската патријаршија, која постави неколку услови, вклучувајќи решавање на името на црквата во Северна Македонија и признавање на православната црква во Украина.

Оттаму, сосема јасно произлегува дека српскиот патријарх Порфириј веќе не е адресата за целосната автокефалност на МПЦ-ОА, туку Вартоломеј во Цариград.