Skip to content
Бугарскиот претседател Румен Радев вчера оствари телефонски разговор со македонската претседателка Гордана Сиљановска-Давкова, при што ја покани да учествува на АКАБА-самитот што ќе се одржи во април во Јордан.
Како што информираат од нејзиниот Кабинет за „360 степени“, поканата е прифатена, а самитот, чиј кодомаќин е Радев заедно со јорданскиот крал Абдула, ќе се фокусира на теми како што се безбедноста, борбата против тероризмот и екстремизмот и спречувањето на илегалната миграција.
Телефонскиот разговор меѓу двајцата претседатели се однесувал и на важноста на конструктивниот дијалог меѓу Македонија и Бугарија, вклучително и во мултилатералните формати.
Претходно, Радев и Сиљановска-Давкова разговараа за истата покана и при нивната средба на 80-годишнината од ослободувањето на концентрациониот логор Аушвиц-Биркенау во јануари. Исто така, лани во ноември имаа билатерална средба на маргините на Конференцијата за климатски промени – ЦОП 29 во Баку.
