Skip to content
Синдикалната минимална кошничка за ноември изнесува 62.021 денар, што значи дека четиричлено семејство без 1.000 евра месечно не може да ги покрие основните трошоци. Според податоците, само овој месец трошоците се зголемиле за 772 денари поради поскапување на прехранбените производи. За семејствата кои живеат во изнајмен стан од 60 квадрати, минималните трошоци достигнуваат 77.396 денари.
„Мерките на Владата не ги донесоа очекуваните резултати. Трговците ги злоупотребија и неосновано ги покачија цените. Само оваа година, минималната кошничка порасна за над 4.800 денари. Владата мора да ги заузда трговците, бидејќи следниот чекор може да бидат протести,“ изјави Иван Пешевски од Сојузот на синдикати на Македонија (ССМ).
Министерот за економија, Бесар Дурмиши, во интервју за ТВ21 изјави дека владините мерки донеле заштеди од 1.200 до 1.500 денари месечно за четиричлено семејство, а во комбинација со мерките за училишен прибор, заштедата во последните два месеца изнесува 3.000 денари.
Министерот најави дека од 15 декември до 15 јануари ќе биде воведена новогодишна кошничка со пониски цени. Трговците ќе изберат производи за кои ќе намалат маржите за 5 проценти, додека производителите ќе го направат истото.
