Трговијата со земјоделски производи падната за над 4 милијарди денари споредено со лани

Вкупната вредност на откупот и продажбата на земјоделски производи во Македонија во првото тримесечје од 2025 година изнесува 5,7 милијарди денари, покажуваат податоците на Државниот завод за статистика. Ова претставува драматичен пад во споредба со истиот период лани, кога биле остварени 9,9 милијарди денари — или речиси 4,2 милијарди денари повеќе.

Најзначајниот пад е забележан во откупот на земјоделски производи од индивидуалните производители, каде вредноста е намалена за дури 50,6% во однос на првиот квартал од 2024 година. Минатата година откупот од индивидуалните земјоделци бележеше огромен пораст од 495,2%, што ја прави годинашната состојба уште позагрижувачка.

Од друга страна, продажбата на земјоделски производи од сопствено производство во првиот квартал од 2025 година бележи пораст од 6,4%, што претставува пресврт во однос на 2024 година, кога беше регистриран пад од 13,2%.

Овие бројки укажуваат на сериозни флуктуации во трговијата со земјоделски производи. Намалувањето на откупот може да се поврзе со повеќе фактори – од промени во политиките за субвенции, преку зголемени трошоци за производство, до можен пад на побарувачката или недоверба меѓу производителите и откупувачите.

Доколку ваквите трендови продолжат, потребна е сериозна анализа и брзи интервенции од страна на надлежните институции со цел стабилизирање на земјоделскиот сектор и заштита на интересите на домашните производители.

С.Т.