Skip to content
Цените растат, а животниот стандард на граѓаните опаѓа, а опозициските партии обвинуваат дека владата не презема мерки за заштита на граѓаните од инфлацијата, туку со својата неактивност придонесува за финансиските тешкотии.
– Ова не е само неспособност, туку и предавство кон граѓаните. Наместо реални решенија, ВМРО-ДПМНЕ нуди пропаганда и ароганција,“ велат од СДСМ.
СДСМ истакнува дека во своето владеење реализирале мерки како покачување на минималната плата и платите во јавниот сектор, но актуелната влада не прифаќа предлог-мерки кои би ја намалиле кризата.
СДСМ поднесе предлог-закон за зголемување на минималната плата на 27.700 денари (450 евра). Во октомври 2024 година, просечната месечна плата изнесувала 685 евра, што е значително пониско од просекот во соседните земји, како Хрватска (1.340 евра) или Словенија (1.514 евра).
И покрај зголемувањето на просечната плата во Македонија за 94% во последните десет години, земјата останува на дното во Европа според висината на примањата.
Податоците на Светската банка покажуваат дека во 2023 година, 86.405 лица живееле во екстремна сиромаштија. Исто така 519.452 лица биле умерено сиромашни.
Овие бројки ги рефлектираат економските предизвици кои бараат итни мерки од властите, но, според опозицијата, одговорните остануваат пасивни.
Граѓаните бараат проактивен пристап и мерки кои ќе ја намалат инфлацијата, ќе ги заштитат примањата и ќе ја подобрат економската состојба на земјата. Но, неизвесно е дали владата ќе се соочи со овие предизвици или ќе продолжи со политиките кои ја поткопуваат довербата кај народот.
