Во Скопје денеска ќе се одржи протестен собир за солидарност со граѓан(к)ите на Србија пред Амбасадата на Србија

Здружението за едукативен развој Еквалис за денеска, понеделник, 30 декември, во 12:00 часот, организира протестен собир за солидарност со граѓан(к)ите на Србија, којшто ќе се одржи пред Амбасадата на Србија во Скопје.

Еквалис го организира овој протест за да испрати силна порака на поддршка и поттик за истрајност кон храбриот српски народ кој со длабока посветеност сака одлучно да го симне авторитарниот режим и да побара политичка одговорност за случајот со срушувањето на настрешницата во Нови Сад во којшто беа убиени 15 луѓе, меѓу кои и еден македонски граѓанин.

На овој протест, пишува во соопштемието на Екбвалис, солидарно ќе им биде дадена поддршка на студент(к)ите во Србија кои ги окупираат факултетите и пробуваат да ја ослбодат својата држава на најавтентичниот начин на којшто младите може да го направат тоа. Како држава којашто во своето демократско растење се има ослободено од авторитарноста преку Студентските пленуми, окупациите на факултетите и прогласувањето на факултетски автономни зони, нам, овој чекор не ни е непознат и нов и знаеме колку посветеност, храброст и истрајност се потребни да се застане на ваков начин во одбрана на својата држава.

На протестот во Скопје ќе биде прочитан говорот и обраќањето на студентот Бошко Ристиќ од Нови Сад. Говорот ќе биде прочитан од страна не неколку студент(к)и од Скопје.

Со овој протест, истакнуваат од Еквалис, се приклучуваат кон барањата на студент(к)ите од Нови Сад коишто ќе бидат прочитани на протесниот собир.