Гардијан: Обединетото Кралство создава алатка за „предвидување убиства“ за да идентификува идни убијци

Владата на Обединетото Кралство развива програма за „предвидување убиства“ за која се надева дека може да ги користи личните податоци на оние што им се познати на властите за да ги идентификува луѓето кои најверојатно ќе станат убијци, пишува британски Гардијан.

Наводно, истражувачите користат алгоритми за да ги анализираат информациите на илјадници луѓе, вклучително и жртви на криминал, додека се обидуваат да ги идентификуваат оние кои се изложени на најголем ризик да извршат сериозни насилни прекршоци.

Шемата првично беше наречена „проект за предвидување на убиства“, но нејзиното име е променето во „споделување податоци за подобрување на проценката на ризикот“. Министерството за правда се надева дека проектот ќе помогне да се зајакне јавната безбедност, но активистите го нарекоа „застрашувачки и дистописки“.

Постоењето на проектот беше откриено од страна на групата за притисок Стејтвоч (Statewatch), а некои од неговите работи беа откриени преку документи добиени од барањата за Слобода на информации.

Стејтвоч вели дека податоците од луѓе кои не се осудени за какво било кривично дело ќе се користат како дел од проектот, вклучувајќи лични информации за самоповредување и детали поврзани со семејна злоупотреба. Официјалните лица категорично го негираат ова, инсистирајќи на тоа дека се користени само податоци за лица со најмалку една кривична пресуда.

Владата вели дека проектот е во оваа фаза само за истражување, но активистите тврдат дека користените податоци ќе создадат пристрасност во предвидувањата против малцинските етнички и сиромашните луѓе.

Министерството за правда вели дека шемата ќе ги „прегледа карактеристиките на сторителот што го зголемуваат ризикот од извршување убиство“ и „да истражува алтернативни и иновативни техники на науката за податоци за проценка на ризикот од убиство“.

Проектот „ќе обезбеди докази за подобрување на проценката на ризикот од сериозниот криминал и на крајот ќе придонесе за заштита на јавноста преку подобра анализа“, додаде портпаролот.

Проектот, кој беше нарачан од кабинетот на премиерот кога Риши Сунак беше на власт, користи податоци за криминал од различни официјални извори, вклучително и Службата за пробација и податоци од полицијата од пред 2015 година.

Видовите обработени информации вклучуваат имиња, датуми на раѓање, пол и етничка припадност, како и број што ги идентификува луѓето на националниот компјутер на полицијата.

Тврдењето на Statewatch дека ќе се користат податоци од невини луѓе и од оние кои отишле во полиција за помош се заснова на дел од договорот за споделување податоци помеѓу Министерството за правда и полицијата.

Делот означен: „тип на лични податоци што треба да ги сподели полицијата“ со владата вклучува различни видови на кривични пресуди, но исто така е наведена возраста на која лицето првпат се појавило како жртва, вклучително и за семејно насилство, и возраста на лицето кога првпат имале контакт со полицијата.

Исто така, податоци што треба да се споделат – и да се наведат под „посебни категории на лични податоци“ – се „здравствени маркери за кои се очекува да имаат значителна моќ на предвидување“, како што се податоците кои се однесуваат на менталното здравје, зависноста, самоубиствата и ранливоста и самоповредувањето, како и попреченоста.

Софија Лајал, истражувач за Statewatch, рече: „Обидот на Министерството за правда да го изгради овој систем за предвидување убиства е најновиот застрашувачки и дистописки пример за намерата на владата да развие таканаречени системи за „предвидување“ на криминалот.

„Постојано и повторно, истражувањата покажуваат дека алгоритамските системи за „предвидување“ на криминалот се инхерентно погрешни“.

Од Стехтвоч уште велат дека „овој најнов модел, кој користи податоци од нашата институционално расистичка полиција и Министерството за внатрешни работи, ќе ја зајакне и зголеми структурната дискриминација во основата на кривично правниот систем“.

„Како и другите системи од ваков вид, тој ќе шифрира пристрасно кон расните и заедниците со ниски приходи. Градењето автоматизирана алатка за профилирање на луѓето како насилни криминалци е длабоко погрешно, а користењето на такви чувствителни податоци за менталното здравје, зависноста и попреченоста е многу наметливо и алармантно“, предупредуваат од Стејтвоч.

Портпаролот на Министерството за правда рече: „Овој проект се спроведува само за истражувачки цели. Дизајниран е со користење на постоечки податоци што ги чуваат затворската и пробациската служба на ХМ и полициските сили за осудените престапници за да ни помогнат подобро да го разбереме ризикот од лицата на условна казна да вршат сериозно насилство. Во догледно време ќе биде објавен извештај“.

Официјалните лица велат дека затворската и условната служба веќе користат алатки за проценка на ризикот и овој проект ќе види дали додавањето нови извори на податоци, од податоците од полицијата и притворите, ќе ја подобри проценката на ризикот.