Групата „Кој е следен“ уличниот форум за безбедност во сообраќајот го закажа за во недела на пладне кај ЗОО Скопје

„Нашите градови се небезбедни! Тоа мора да се промени. На уличниот форум ги собираме сите идеи и предлози за посигурни улици – од железнички градски превоз во Скопје, до урбанистички промени за подобрување на сообраќајната култура. Со затворање на раскрсницата пред Зоолошката градина, се обединуваме со пошироката и стручна јавност и испраќаме недвосмислена порака – безбедноста во нашите градови не е прашање на избор, туку неопходност“, велат од „Кој е следен?“.

Оттаму додаваат дека постојат конкретни и изводливи решенија за создавање поуреден, безбеден и функционален урбан простор, додавајќи дека е време сите заедно да застанеме зад мерки што ќе гарантираат долгорочна сигурност во домовите и на улиците каде што живееме, работиме и се движиме секојдневно.

За во недела е најавен и протестен марш во Неготино за правда за 22-годишната Фросина.

На 16 февруари (недела), ќе се одржи протест и во Скопје, но организаторите посочија дека повеќе детали ќе објават во наредните денови.