Лондон и Париз ќе ги координираат нуклеарните сили за одвраќање на Русија

Велика Британија и Франција се договорија да нарачаат дополнителни крилести ракети „Сторм Шадоу“, додека паралелно разговараат за заеднички развој на нивен наследник, како дел од обновениот одбранбен пакт, објавија британските медиуми по посетата на францускиот претседател Емануел Макрон на Лондон.

Ракетата „Сторм Шадоу“, или СКАЛП како што ја нарекуваат Французите, има долг дострел и веќе се користи од страна на Украина за напади во длабочина на руската територија. Двете држави со години разговараат за развој на нова генерација ракети, но сега, со оваа посета, официјално започнува следната фаза од проектот.

Заедничкиот развој ќе обезбеди над 1.300 работни места во Велика Британија, соопшти Владата во Лондон.

На третиот ден од државната посета на Макрон, тој и британскиот премиер Кир Стармер ќе потпишат и договор за продлабочување на нуклеарната соработка. Двете земји – единствените нуклеарни сили во Европа – ќе изразат подготвеност за координација на нивниот нуклеарен арсенал со цел одвраќање од потенцијални закани како Русија.

Оваа декларација доаѓа во момент кога администрацијата на Трамп во САД бара од европските сојузници во НАТО да преземат поголема одговорност во безбедноста на континентот.

– Од војната во Европа, до зголемени нуклеарни ризици и секојдневни сајбер-напади – заканите растат. Како блиски партнери во НАТО, Британија и Франција имаат долга традиција на одбранбена соработка, а новите договори го подигнуваат ова партнерство на ново ниво, изјави Стармер.