Skip to content
Студентите сѐ уште ги блокираат сите три влеза во зградата на Радио телевизија на Србија (РТС) на улицата Таковска во центарот на Белград. По бурната ноќ, во која жандармеријата тепаше студенти, утрото е мирно, јавуваат денеска независните српски медиуми.
N1 Србија известува дека чуварите формирале човечки ѕид пред главниот влез и не им дозволуваат на вработените да влезат во зградата. Истовремено, оние вработени кои сакаат можат слободно да ја напуштат зградата.
Студенти за Нова.рс изјавија дека утрово неколку лица, најверојатно вработени во РТС, се обиделе да влезат во зградата, но им било кажано дека е во тек блокада.
Се појави информација дека некои студенти отишле на Кошутњак, за да го блокираат второто студио на РТС од кое може да се емитува програма. Меѓутоа, оттогаш полицајците ги блокираа сите приоди до студиото, а во дворот има бројни џипови на Жандармеријата, полициски комбиња и автомобили.
Покрај студентите, пред зградата на РТС има и граѓани кои им даваат поддршка. Повремено, луѓето скандираат: „Кој не скока е будала“ и „Пумпај“. Забележан е и транспарент со порака „Моби, мајка ти“, адресиран до новинар на РТС кој ги нарече студентите толпа, што иницираше блокада на јавниот сервис.
Инаку, блокадата почна синоќа околу 23 часот. Акцијата беше спонтана, објавена на социјалните мрежи непосредно пред почетокот, а студентите истакнаа дека блокадата ќе трае 22 часа и ги повикаа граѓаните да им дадат поддршка.
Бранот протести во Србија беше предизвикан од смртта на 15 лица при уривање на настрешница на железничката станица во Нови Сад на 1 ноември минатата година, а по нападот врз студентите кои им оддаваа почит на жртвите на протестот, блокирани беа повеќе од 60 факултети на сите четири државни универзитети.
Покрај секојдневните комеморации со 15 минути молк низ Србија, неколку масовни протести се одржани во Нови Сад, Белград, Крагуевац и Ниш, а најавен е и голем протест за 15 март во Белград.
