Филозофскиот факултет од Ниш се прогласи за слободна територија за студентските протести

Се наоѓате на безбедна и слободна територија наречена Филозофски факултет. Ви благодариме што се разбудивте и ја презедовте работата од наши раце. Ние изгледа не знаевме да ги решиме проблемите, рече Наталија Јовановиќ, декан на овој факултет во Ниш, која ширум ја отвори вратата за студентската блокада поради трагедијата во Нови Сад, кога при пад на настрешницата загинаа 15 лица, пишува денеска Данас.

Јовановиќ е еден од ретките раководители на факултети во Србија кои јавно ги поддржаа актуелните студентски барања и протести.

Според нејзиното мислење, истото треба да го направи и секој друг професор или декан, бидејќи тоа го диктира и нивната професија и личната совест.

Факултетот ги поддржа студентските барања, и осуди репресијата врз учесниците во протестите за трагедијата во Нови Сад.

„Конечно, имаме генерација која реши да создаде здраво општество, без кое на никој од нас нема да му биде добро. Паметни млади, а и наши“, рече Јовановиќ во амфитеатарот преполн со студенти кои во петокот во 11:52 часот го блокираа факултетот.

Ваквиот нејзин јавен став беше проследен со текстови во провладините таблоиди дека во јули годинава наводно била уапсена во акцијата на СБПОК како дел од група која местела тендери за нишката градежна компанија „Авенија систем“.

Во исто време беше објавено дека нејзината поддршка за студентите е всушност лажна, за да се претстави како политичка жртва во случај да биде осудена.

„Се разбира, ништо од тоа не е точно. Не сакам да поднесувам тужби против медиумите, но овој пат можеби ќе треба. Доста е со лагите и заробената држава. Но, што сакаат нека ми прават, вие ќе продолжите“, им порачала на студентите, додавајќи дека најтешко и биле лагите дека не ги поддржува.

Инаку, Јовановиќ е активен учесник во граѓанските и други протести во Ниш од деведесеттите години на минатиот век.