Пет планинари од Зеница загинаа додека се искачуваа на планината Елбрус во Русија

Пет планинари од Зеница загинале додека се искачуваа на планината Елбрус во Русија. Според извештаите на медиумите од Босна и Херцеговина, жртвите се докторката Мелиха Чаушевиќ, Алма и Денис Окановиќ, Алмир Кривдиќ и Нермин Талам. Двајца членови на експедицијата, Харис Адиловиќ и Кемал Видимлиќ, ја преживеале несреќата.

Босанските медиуми ја објавија и последната изјава на еден од паднатите планинари пред да замине на искачувањето. Заедно со фотографиите од патувањето, тој напишал: „Илјадници километри зад нас, еден врв пред нас и само еден сон“.

Времето одеднаш се влоши

Несреќата се случи откако групата од седум члена тргна кон највисокиот врв во Европа. Временските услови првично беа поволни, но брзо се влошија. Ветерот прво дуваше со брзина од околу 45 километри на час, а до утрото се засили на околу 70 километри на час.

Еден од преживеаните успеал сам да се симне од планината и да повика помош, додека другиот беше пронајден од спасувачите. Двајцата биле префрлени во болница, каде што им била укажана лекарска помош.

Планината Елбрус, со истоимениот врв, е највисоката планина во Русија и Европа. Тоа е неактивен стратовулкан кој се издига на 5.642 метри надморска височина и е највисокиот вулкан во Евроазија, како и десеттиот најистакнат врв во светот.