Турција уапси 11 лица поради пожарот во хотелот во ски-центар во кој загинаа 79 лица

Турција приведе 11 лица како дел од истрагата за пожарот во кој загинаа 79 луѓе, а десетици беа повредени во ски-центар во планините Болу, изјави во средата министерот за правда Јилмаз Тунч.

Заменик-градоначалникот на северозападната провинција Болу, шефот на противпожарната служба на општината, сопственикот и менаџерот на хотелот се меѓу приведените, рече Тунч на Х.

Во средата беа одржани неколку погреби за жртвите од пожарот во вторникот, меѓу кои имаше и многу деца. Пожарот ги натера паничните гости на хотелот да скокнат од прозорците среде ноќ.

„Нашите срца и души болат“, рече претседателот Тајип Ердоган на погребот на осумте жртви од исто семејство во Болу во западна Турција.

„Се молам за трпение за целото семејство и нашата нација.“

Телата на 45 жртви се предадени на нивните семејства, а се спроведуваат форензички ДНК тестови за да се идентификуваат останатите, соопшти владата.

Министерот за внатрешни работи во вторникот објави дека 76 лица загинале во пожарот, но обвинителството во Болу го ажурираше бројот на загинати на 79 во средата вечерта по форензичките ДНК тестови.

Пожарот се случи во хотелот Гранд Картал во ски-центарот Карталкаја, хотел на 12 ката во кој имало регистрирани 238 гости.

Некои преживеани рекоа дека не слушнале аларми за пожар за време на инцидентот, а гостите рекоа дека морале да се движат по ходниците исполнети со чад во целосна темнина.

Хотелот вети целосна соработка со истрагата и соопшти дека се „длабоко тажни поради загубите“.

Според извештаите на локалните медиуми, најмалку 20 од жртвите на пожарот се деца.

Ердоган ја прогласи среда за ден на национална жалост по трагедијата, која се случи за време на шпицот на зимската туристичка сезона, при што многу семејства од Истанбул и Анкара отпатуваа до планините Болу за да скијаат.