Шок на УС Опен, Ѓоковиќ и Сабаленка испаднаа за само 49 минути

Новак Ѓоковиќ и Арина Сабаленка, првите носители во конкуренцијата на мешани двојки на УС Опен, доживеаја неочекувана елиминација уште во првото коло. Ѕвездениот тандем го доби првиот сет, но потоа целосно го загуби ритамот и по само 49 минути беше поразен од Катерина Сињакова и Хенри Патен.

Ѓоковиќ и Сабаленка добро го отворија мечот на стадионот „Артур Еш“ и првиот сет го добија со 4:1. Во тој момент изгледаше дека фаворитите сигурно чекорат кон четвртфиналето.

Но следуваше целосен пресврт.

Сињакова и Патен го добија вториот сет со 4:2, а потоа беа убедливи во решавачкиот тај брејк, кој го освоија со 10:2. Чешко британската комбинација ја потврди големата сензација со ас на меч топката.

Поразот е уште поголемо изненадување ако се земе предвид дека Ѓоковиќ и Сабаленка беа поставени за први носители и беа една од главните атракции на годинашниот турнир во мешани двојки. Организаторите ги собраа некои од најголемите имиња во светскиот тенис, а победничкиот пар ќе заработи еден милион долари.

Сињакова, една од најуспешните тенисерки во двојки во последните години, и Патен покажаа зошто специјалистите за двојки можат да бидат исклучително опасни и против најголемите ѕвезди од сингл конкуренцијата.

Форматот на турнирот дополнително остава мал простор за грешка. До полуфиналето сетовите се играат до четири освоени гема, а при израмнет резултат се игра решавачки тај брејк до десет поени.

Така, долгоочекуваниот заеднички настап на Ѓоковиќ и Сабаленка заврши речиси веднаш откако започна.

За Сињакова и Патен, пак, следува четвртфинален дуел против Елина Свитолина и Гаел Монфис, кои во своето прво коло убедливо славеа со 4:1 и 4:1.