Активисти од бродовите кои пловат за Газа: „Доаѓаат по нас, опкружени сме“

Неколку неидентификувани бродови вечерва се приближија до меѓународната флотила која се обидува да достави хуманитарна помош во опколената Газа, потврдиле два извори од бродовите, објави Reuters. Идентитетот на бродовите засега не е познат, а нивното приближување се случило само неколку часа по претходен инцидент со израелски воени бродови.

Флотилата претходно соопшти дека израелските бродови пред зори се приближиле до некои од нивните пловила и изведувале „опасни и застрашувачки маневри“ додека се приближувале кон палестинската територија. Израелските власти засега не дале коментар.

Драматични пораки од бродовите:
„Веќе доаѓаат по нас. Дваесетина бродови нè чекаат“, порача Хосе Луис Ибот, еден од патниците на флотилата, во видео објавено на социјалните мрежи.

На еден од 50-те бродови кои се обидуваат да достават помош се наоѓаат и шведската климатска активистка Грета Тунберг и хрватската правничка Морана Мијановиќ, капетанка на еден од бродовите.

Израел претходно соопшти дека ќе ги употреби сите расположливи средства за да спречи бродовите да стигнат до Газа, тврдејќи дека нивната поморска блокада е легална во борбата против Хамас. Израелската офанзива започнала по нападот на Хамас врз Израел на 7 октомври 2023 година, при што, според израелските податоци, загинале околу 1.200 лица, а 251 биле земени како заложници.

Според здравствените власти во Газа, во офанзивата досега загинале повеќе од 65.000 луѓе, а голем дел од населението очајно има потреба од храна и хуманитарна помош.