Анкара не дозволи делегација од европски градоначалници да го посетат Имамоглу во затворот

Барањето на европските градоначалници кои пристигнаа во Турција да го посетат разрешениот градоначалник на Истанбул, Екрем Имамоглу, кој е во затвор во Силиври, беше одбиено од Министерството за правда, објави Халк ТВ.

Градоначалниците денес беа пречекани во општината Сараџане во Истанбул од заменик-градоначалникот Нури Аслан и ја посетија зградата на општината. По пречекот, Аслан рече дека Министерството за правда им одбило дозвола на европските градоначалници да го посетат Имамоглу во Силиври.

Нури Аслан рече дека градоначалниците на градовите-членки на Eurocities и B40 ќе одат во Силиври во 14:00 часот за да ја понудат својата поддршка, иако не добиле дозвола од министерството.

„Специјалната награда за демократија“ доделена на Имамоглу од европските градоначалници беше врачена на сопругата на уапсениот градоначалник, Дилек Имамоглу. Наградата на Имамоглу му ја врачи градоначалникот на Барселона, Колбони.

Имамоглу беше избран за градоначалник на Истанбул во 2019 година и повторно избран во 2024 година. Тој беше уапсен на 19 март во врска со истрага за „корупција“ и наводи за „терористички врски“.

Серијата обвиненија против него би можеле да го спречат да се кандидира на следните претседателски избори.

Неговото апсење предизвика национални демонстрации кои ескалираа во најлошите улични немири од протестите во паркот Гези во 2013 година, кои се проширија низ цела Турција и беа брутално потиснати од полицијата.