Експлозија на боца во ресторан во Чешка, шест загинати

Шест лица загинаа, а осум се повредени во експлозија на плинска боца и пожар во ресторан во Чешка. Инцидентот се случи во центарот на индустрискиот град Мост, кога греалка паднала, а боцата со пропан гас експлодирала, предизвикувајќи голем пожар.

Според противпожарната служба, пламенот се проширил со неверојатна брзина. Околу 30 луѓе успеале да се евакуираат од ресторанот и соседните згради.

По пристигнувањето на местото на несреќата, пожарникарите започнале со гасење на огнот и испратиле група пожарникари да го спасат повредениот гостин, кој бил затворен на тоалетот. Тешко повредениот беше спасен од горечката зграда.

Пламените јазици достигнале висина од два до три метри, што било видливо и на соседните згради. Градежен инженер ќе ја процени безбедноста на објектот и ќе утврди дали е потребно да се урне.

Полицијата започнала истрага поради сомнение за загрозување на животот и здравјето на луѓето.