Фејсбук ги укинува „факт чекерите“ – Ќе има повеќе политика на мрежите

Мета, компанијата која ги поседува Фејсбук и Инстаграм, најави дека ќе ги укине „факт чекерите“ и ќе препорача повеќе политички содржини на своите платформи. Основачот Марк Цукерберг изјави дека оваа одлука е дел од новата стратегија која ќе стави поголем акцент на слободата на говорот, особено по враќањето на Доналд Трамп во Белата куќа.

„Проверувачите на факти на Мета се премногу политички пристрасни и уништиле повеќе доверба отколку што создале“, рече Цукерберг, објаснувајќи дека сегашниот систем ќе биде заменет со заеднички белешки слични на оние што ги користи платформата X (поранешен Твитер).

Според најавите, промените најпрво ќе започнат во САД, а потоа ќе се прошират и на глобално ниво. Цукерберг истакна дека „драстично ќе се намали цензурата“ и ќе се овозможи поотворена дискусија, додека корисниците ќе добијат поголема контрола врз споделените информации.

Овој потег предизвика различни реакции – од поддршка за зголемената слобода на говор до критики дека ова може да ја зголеми дезинформацијата на платформите.