Skip to content
Околу 10.000 луѓе се собраа пред зградата на литванскиот парламент во знак на протест против забрзаните измени на законот што го регулира работењето на јавниот радиодифузен сервис, јавуваат странските медиуми.
Демонстрантите предупредија дека предложените законски измени ја загрозуваат слободата на говор и ја поткопуваат независноста на Литванското национално радио и телевизија (LRT), во период на засилена политичка криза во земјата.
Според предлогот на владејачката коалиција, би се намалил прагот потребен за разрешување на генералниот директор на јавниот сервис. Наместо сегашната процедура, управниот одбор би можел со тајно гласање, со помал број гласови и врз пошироко дефинирани основи, да го смени првиот човек на LRT.
Критичарите на измените тврдат дека мерките се насочени конкретно кон актуелниот генерален директор и дека претставуваат обид за политичко влијание врз јавниот медиум, што, според нив, сериозно ја доведува во прашање неговата уредувачка автономија и улогата во демократското општество.