Индија и Пакистан меѓусебно се обвинуваат за нуклеарна неодговорност

Индија и Пакистан меѓусебно се обвинуваат за недоволна контрола врз својот нуклеарен арсенал и ја повикаа меѓународната заедница да изврши увид и надзор врз нуклеарните капацитети на другиот, само неколку дена по најсериозниот воен судир меѓу двете земји во последните децении, предизвикан од тензиите околу Кашмир.

„Нуклеарниот арсенал на Пакистан треба да биде под надзор на Меѓународната агенција за атомска енергија (МААЕ)“, изјави индискиот министер за одбрана Рајнат Синг за време на посетата на војниците во индиски Кашмир.

„Му поставувам прашање на целиот свет: дали нуклеарното оружје е безбедно кога се наоѓа во рацете на една неодговорна и неконтролирана држава?“, додаде тој.

Пакистан остро реагираше на изјавата, обвинувајќи ја Индија за „повторени случаи на кражба и шверц на нуклеарни и радиоактивни материјали“ и повика МААЕ и меѓународната заедница да преземат мерки.

Обвинувања и повици за истрага

Министерството за надворешни работи на Пакистан потсети на серија инциденти од 2021 година, кои, според нив, укажуваат на постоење на црн пазар со чувствителни двојно-наменски материјали во Индија. Исламабад повика на „сеопфатна и независна истрага“. Индија досега нема официјално одговорено на овие тврдења.

Воена ескалација

Во ноќта меѓу 6 и 7 мај, индиските сили истрелаа проектили кон цели на територијата на Пакистан, каде наводно се криеле членови на џихадистичка група осомничена за нападот во Пахалгам (Кашмир) на 22 април, во кој загинаа 26 лица. Пакистан, негирајќи поврзаност со нападот, веднаш возврати.

Во следните четири дена, двете армии разменуваа артилериски оган, ракетни напади и напади со беспилотни летала. Ова се смета за најинтензивен конфликт меѓу Индија и Пакистан од војната во 1999 година.

Американскиот претседател Доналд Трамп во саботата соопшти дека е постигнат договор за итен прекин на огнот, изразувајќи задоволство што е спречен потенцијален нуклеарен судир со катастрофални последици.

Напнатости и понатамошни изјави

И покрај примирјето, вербалната конфронтација продолжува. „Индија нема да прифати нуклеарна уцена“, изјави премиерот Нарендра Моди во понеделникот вечерта.

Индија категорично негира дека ја нападнала наводната пакистанска нуклеарна база во областа Кирана. „Ние не ги гаѓавме ридовите Кирана или што и да се наоѓа таму“, изјави генерал АК Бхарти од индиското воздухопловство.

Се претпоставува дека токму таму се наоѓа дел од пакистанскиот нуклеарен арсенал, иако тоа никогаш официјално не е потврдено. Локацијата е оддалечена околу 200 километри од местата погодени од индиските ракети.

Портпаролот на индиското Министерство за надворешни работи, Рандир Џаисвал, изјави дека воената операција на Индија била „во рамки на конвенционалното војување“.

Пакистан: „Нуклеарната опција не е на маса“

Пакистанска страна повеќепати потенцираше дека нуклеарното оружје нема да биде употребено. „Таков конфликт би бил апсурден и крајно опасен, бидејќи би довел во ризик животот на 1,6 милијарди луѓе“, изјави генерал Ахмед Чаудри, портпарол на пакистанската војска.

Според податоците на Пакистан, во индиските напади загинале 40 лица, од кои половина жени и деца, како и 13 војници. Индија пак соопшти дека на нејзина територија загинале 16 цивили и пет војници.