Индискиот премиер Моди повика на единство по повод Меѓународниот ден на јогата

Индискиот премиер Нарендра Моди ја предводеше денеска прославата на Меѓународниот ден на јогата во Обединетите нации во Њујорк и ги повика луѓето „да си подадат рака еден до друг за да ја постигнат целта на една земја, едно семејство, една иднина“.

Во 2014 година, Обединетите нации го прогласија 21 јуни за Меѓународен ден на јогата, усвојувајќи мерка предложена од самиот Моди.

„Да ја искористиме моќта на јогата, не само за да бидеме здрави, среќни, туку и да бидеме љубезни кон себе и еден кон друг. Да ја искористиме моќта на јогата за да изградиме мостови на пријателство, мирољубив свет и почиста, позелена и поодржлива иднина“, им рече Моди на насобраните приврзаници на јогата кои седеа на жолти душеци на северниот тревник на седиштето на ОН.

Моди е во САД на разговори со претседателот Џо Бајден, кои Белата куќа ги смета за зајакнување на „едно од клучните партнерства на нашето време“.

Тој беше во САД пет пати откако стана премиер во 2014 година, но ова ќе биде негово прво патување со целосен дипломатски статус на државна посета, и покрај загриженоста за тоа што се смета за влошена состојба на човековите права под неговиот хиндуистички националист Бхаратија Џаната. 

Планирано е Моди вечер да замине од Њујорк за Вашингтон на приватна вечера со Бајден, по што ќе има разговори во Белата куќа и државничка вечера утре.

Пред да излезе на сцената денеска за да зборува Моди оддаде почит пред бистата на индискиот херој за независност Махатма Ганди во седиштето на ОН.

Генералниот секретар на ОН Антонио Гутереш испрати видео порака по повод одбележувањето на Светскиот ден на јогата, велејќи дека сака „да му оддаде признание на премиерот Моди за сè што направил за да го промовира разбирањето на јогата и нејзините многубројни придобивки“