Skip to content
Шри Ланка се соочува со една од најтешките природни катастрофи во последните децении, откако обилните дождови предизвикаа разорни поплави и бројни свлечишта. Според најновите податоци на Центарот за управување со катастрофи, загинале најмалку 123 лица, а десетици илјади се принудени да ги напуштат своите домови.
Во извештајот се наведува дека околу 130 лица се водат како исчезнати, јавува „Фигаро“. Спасувачките тимови работат без прекин, но пристапот до многу погодени подрачја е речиси невозможен.
Генералниот директор на центарот, Сампат Котвегода, изјави дека земјата веќе една недела е зафатена од силна бура која предизвика драматично излевање на реките и уништување на цели населби. Повеќе од 44.000 жители се раселени, а бројката постојано расте.
Армијата е распоредена на најкритичните локации. Војници, хеликоптери и воени бродови изведуваат паралелни спасувачки операции, при што луѓето се евакуираат од крошни на дрвја, покриви и од целосно отсечени села.
Надлежните служби предупредуваат дека постои ризик од нови свлечишта и дополнителни поплави, бидејќи врнежите не запираат. Властите апелираат жителите во ризичните региони веднаш да се евакуираат.
