Skip to content
Посредниците во понеделникот им го дадоа на Израел и Хамас конечниот нацрт на договорот за ставање крај на војната во Газа, изјави официјален претставник информиран за преговорите, по полноќниот „пробив“ во разговорите на кои присуствуваа и претставниците на Џо Бајден и на Доналд Трамп.
Официјалниот претставник рече дека текстот за прекин на огнот и ослободување на заложниците беше претставен од Катар на двете страни на разговорите во Доха, во кои беа вклучени и шефовите на израелските шпионски агенции Мосад и Шин Бет и премиерот на Катар.
Стив Виткоф, кој ќе стане претставник на САД кога Трамп ќе се врати во Белата куќа следната недела, присуствуваше на разговорите, рече официјалниот претставник. Извор од САД рече дека таму бил и пратеникот на администрацијата на Бајден во заминување, Брет Мекгурк.
„Следните 24 часа ќе бидат клучни за постигнување на договорот“, рече официјалниот претставник, окарактеризирајќи го нацртот како резултат на пробивот постигнат во раните утрински часови во понеделникот.
Владејачкиот емир на Катар, шеикот Тамим бин Хамад ал Тани, ја прими делегацијата на Хамас предводена од високиот функционер Калил ал Хаја за да разговараат за прекин на огнот, соопшти канцеларијата на емирот.
Израелското радио Кан, цитирајќи израелски официјален претставник, во понеделникот објави дека израелската и делегацијата на Хамас во Катар добиле нацрт и дека израелската делегација ги информирала израелските водачи.
Официјални лица од двете страни, иако не потврдија дека е постигнат конечниот нацрт, го опишаа напредокот на разговорите.
„Преговорите за некои суштински прашања постигнаа напредок и работиме да го заклучиме она што останува наскоро“, изјави претставник на Хамас за Ројтерс во понеделникот, барајќи да остане анонимен поради чувствителноста на ова прашање.
Израелскиот министер за надворешни работи Гидеон Сар изјави дека преговорите се координираат меѓу тимовите на Бајден и Трамп.
„Има напредок, изгледа многу подобро од претходно. Сакам да им се заблагодарам на нашите американски пријатели за огромните напори што ги вложуваат за да обезбедат договор за заложниците“, им рече Саар на новинарите.
Соединетите Американски Држави, Катар и Египет работеа повеќе од една година на разговори за ставање крај на војната во Газа, досега без резултат.
Во Каиро, египетски официјален претставник за безбедност изјави за Ројтерс дека нацртот испратен до двете завојувани страни не го сочинува конечниот договор, туку „има цел да ги реши отворените прашања што ги попречуваа претходните преговори“.
Израелскиот канал 12 објави дека на израелските владини институции им било кажано да се подготват за преземање на слаби и болни заложници.
Во понеделникот продолжи крвопролевањето во Газа, при што израелските напади убиле најмалку 21 лице, соопштија медицинските лица, вклучително и петмина загинати во нападот во училиште во градот Газа во кое се засолниле раселените семејства.
Израелската војска соопшти дека пет војници биле убиени во борбите во северниот дел на Газа, со што бројот на нејзините војници загинале од саботата на девет.
Во последните неколку месеци, борбите беа особено интензивни долж северниот раб на Газа, каде Израел вели дека се обидува да го спречи Хамас да се прегрупира, а Палестинците го обвинуваат Израел дека сака трајно да ја наруши тампон зоната.
Портпаролот на вооруженото крило на Хамас, Абу Убаида, рече дека борците на групата ги нападнале израелските сили во областа при што загинале најмалку 10 војници и раниле десетици други во изминатите 72 часа.
