Skip to content
Најмалку едно лице загина, а уште 15 се повредени – меѓу нив и едно дете – во масовниот ноќен напад што руските сили го изведоа врз Киев со ракети и борбени дронови. Мета на нападот биле станбени згради низ повеќе делови од градот, предизвикувајќи голема материјална штета и серија пожари, пренесува The Kyiv Independent.
Првите експлозии биле забележани нешто по 1 часот по полноќ, а нападите продолжиле во бранови неколку часа. Околу 7 часот наутро уследил нов, уште посилен ракетен удар, во кој биле употребени десетици проектили, меѓу кои и хиперсонични ракети „Кинжал“.
Штета и пожари на повеќе локации
Локалните власти потврдија дека штета е нанесена на најмалку шест точки во реоните Свјатошински, Дњипровски, Дарницки, Шевченковски и Соломенски.
Во повеќе висококатници целосно се уништени станови на горните катови, а на други објекти е регистрирана штета на пониските нивоа. Пожари избувнале во најмалку шест станбени згради.
Спасувачки акции и жртви
Спасувачите цела ноќ ги пребарувале урнатините. Телото на загинат маж е пронајдено во Свјатошинскиот реон, соопшти шефот на Киевската областна воена управа, Тимур Ткаченко. Градоначалникот Виталиј Кличко информира дека најмалку осум повредени лица биле префрлени во болница, меѓу кои и едно дете од Шевченковскиот дел на градот.
Прекини во снабдувањето со струја и вода
По утринскиот бран напади, делови од Киев останале без електрична енергија. Кличко потврди дека западниот дел на градот е целосно без струја, а екипите работат на санација на мрежата.
Регистриран е и намален притисок на водата во зградите на десната страна од Дњепар.
Нападите го зафатија и поширокиот регион
Во Киевската област повредени се најмалку две лица. Во Бровари е оштетена деветкатница, а регионалниот гувернер Микола Калишник пријави штета и на повеќе семејни куќи, како и на околу дваесет гаражи.
Русија и понатаму редовно изведува ракетни и дрон-напади врз украинските градови, често таргетирајќи цивилна инфраструктура. Пред само неколку дена, во сличен напад врз Киев загинаа седуммина, а 20 лица беа повредени.
