Руте ги предупреди сојузниците: Можеме да бидеме следната цел на Русија

Генералниот секретар на НАТО, Марк Руте, ги повика сојузничките земји да ги засилат своите одбранбени напори за да се спречи војната што ја води Русија, а која би можела да биде од размери невидени од генерациите пред нас, пренесува Reuters.

Во говор во Берлин, Руте посочи дека премногу членки на Алијансата не ја чувствуваат доволно силно итноста на руската закана во Европа, нагласувајќи дека потребно е брзо зголемување на трошоците за одбрана и на военото производство за да се избегне голем вооружен конфликт.

„Ние сме следната цел на Русија. Стравувам дека премногу земји се тивко самозадоволни. Премногу од нив не ја чувствуваат итноста. А премногу веруваат дека времето работи за нас. Не е така. Време за акција е сега“, изјави Руте.

Тој додаде дека конфликтот е веќе на прагот на Европа.

„Русија повторно ја донесе војната во Европа. И мора да бидеме подготвени“, нагласи генералниот секретар.

Руте истакна и дека Русија би можела да биде подготвена да употреби воена сила против НАТО во рок од пет години, што дополнително ја зголемува потребата од координиран и засилен одбранбен ангажман на сите членки на Алијансата.