Руте: Стабилноста во Босна и стабилноста во Србија е во интерес на сите

Генералниот секретар на НАТО Марк Руте денеска во Братислава изјави дека стабилноста на Косово, Босна и Херцеговина и Србија е во интерес на сите и дека не гледа причина да верува дека може да има некаква драматична промена во посветеноста на Америка кон западната воена алијанса.

За време на престојот во Братислава, тој во дебата со студентите беше прашан дали гледа можност конфликтот на Косово да продолжи, бидејќи се шпекулира дека новата американска политика може да доведе до нивно воено повлекување.

„Да бидам совршено јасен, моето разбирање за американскиот систем е дека тие се целосно посветени на НАТО и тековните обврски. Но, да видиме што ќе се случи. Секогаш можеме да имаме промени во политиката или мали прилагодувања што може да се случат. Словаците, Холанѓаните и другите го прават тоа. Но, немам причина да верувам дека ќе има некакви драматични одлуки. И во Западен Балкан воопшто, мораме да се погрижиме да го задржиме овој регион во фокусот бидејќи стабилноста на Косово, стабилноста во Босна и стабилноста во Србија е во интерес на сите нас“, одговори Руте.

Изјавата на Руте доаѓа во време на напнати односи меѓу Европа и САД, по чекорите преземени од американската администрација со Русија за ставање крај на војната во Украина.

Мисијата на КФОР на Косово е на функција од 12 јуни 1999 година, а нејзиниот мандат беше одреден со резолуцијата 1244 на Советот за безбедност на ОН од 1999 година.