Skip to content
Жестока дебата во Европскиот парламент предизвика бурни реакции откако левицата иницираше расправа под наслов „Стопирање на геноцидот: време е за санкции од ЕУ“, обвинувајќи ја Европската Унија за молк во врска со страдањата во Газа.
„Геноцид, геноцид, геноцид“ – европратеничка од левицата
Француската европратеничка Манон Обри жестоко ја нападна високата претставничка на ЕУ за надворешна политика Каја Калас, велејќи дека „го игнорира геноцидот“ во Газа и дека со тоа е „соучесник во масакрите и гладта што траат 18 месеци“. Обри го обвини Брисел дека не користи соодветна терминологија и дека толерира кршење на меѓународното право.
Калас одговори дека Израел има право на самоодбрана, но призна дека „оди подалеку од тоа“ и изрази загриженост за „непропорционалната сила, нападите врз цивилна инфраструктура и хуманитарната блокада“.
„Израел мора да се соочи со своите екстремисти,“ рече Калас, додавајќи дека „блокадата на храна и лекови не ја штити израелската безбедност“.
Шпанецот Жираута Видал со провокација: „Хајл Израел“?
Најконтроверзниот момент дојде од Хуан Карлос Жираута Видал, европратеник од шпанската крајна десница „Вокс“, кој ги негираше обвинувањата за геноцид и ги нарече „антисемитизам“. Според очевидци, по своето излагање рекол „Хајл Израел“, што предизвика гневна реакција од опозицијата.
Претседателот на парламентот најави дека ќе се истражи дали навистина бил искористен нацистичкиот поздрав во политичка манипулација.
„Двојни стандарди ја трујат надворешната политика на ЕУ“
Шпанскиот социјалист Начо Санчез Амор рече дека „Израел користи глад како оружје“, критикувајќи ја т.н. „бомбардирна стратегија“ врз густо населени области, споредувајќи ја со Герника. Тој ја обвини ЕУ за лицемерие:
„Двојните стандарди се рак на надворешната политика на ЕУ“, рече тој.
Ставовите во ЕУ остануваат длабоко поделени
Финскиот пратеник Себастијан Тинкинен и други од Европските конзервативци и реформисти (ECR) тврдеа дека вистинскиот геноцид го врши Хамас, кој има „џихадистички план за бришење на Израел“.
И покрај бурната дебата, високата претставничка Калас призна дека санкции против Израел се малку веројатни поради недостаток на единство меѓу земјите-членки.
