Стотици илјади луѓе се капеа во светите реки во Индија за време најголемиот верски фестивал во светот

Стотици илјади хиндуистички аскети и милиони поклоници оваа недела се капеа во ледената вода на соединувањето на светите реки во северна Индија. Ова е првата од серијата големи капења на фестивалот Маха Кумбх, најголемата верска конгрегација во светот, која се одржува во градот Прајаграј, каде се спојуваат реките Ганга, Јамуна и митската Сарасвати.

Фестивалот, кој се одржува на секои 12 години, започна во понеделникот, се проценув дека 15 милиони поклоници присуствувале на свеченото капење во светите реки. Во следните шест недели се очекува настанот да привлече повеќе од 400 милиони луѓе.

Хиндусите веруваат дека капењето на ова соединување ги чисти од гревови и ги ослободува од циклусот на реинкарнација. Фестивалот има корени во хиндуистичка традиција која вели дека богот Вишну извлекол златен бокал со нектар на бесмртност од демоните, а неколку капки паднале на четири места: Прајаграј, Насик, Уџајн и Харидвар.

Датумот на фестивалот се одредува според космичката усогласеност на Сонцето, Месечината и Јупитер. Помали верзии се одржуваат на секои три години.

Оваа година, фестивалот е најголемиот досега. Владата вложи над 765 милиони долари за организација, изградба на шаторски град со 3.000 кујни и 150.000 тоалети. Вклучени се и 50.000 безбедносни лица за ред и управување со толпата.

Иако капењето е секојдневно, на најсветите денови милиони луѓе го следат примерот на аскетите. Во вторникот, цели семејства маршираа во долги редови за да учествуваат во ритуалите, а властите издаваа предупредувања за избегнување на стампеда.

„Ова е кулминација на толку многу духовно стремење, фасцинантно е да се види како сите имаат една цел,“ вели Стивен Баркер, уметник од Њујорк, кој присуствувал на фестивалот.