Унгарска платформа за промоција на европскиот идентитет добитник на Младинската награда „Карло Велики“

Унгарската платформа „Форум Еуропеум“, која преку статии, подкасти, видеа на ТикТок и интервјуа ги промовира европскиот идентитет, вредности и единство, е добитник на Европската младинска награда „Карло Велики“ за 2025 година.

Лауреатот на наградата, што ја доделуваат Европскиот парламент и Фондацијата на Меѓународната награда „Карло Велики“, беше соопштен денеска на свечена церемонија во германскиот град Ахен.

„Форум Еуропеум“, кој функционира како паневропски тинк-тенк и медиум, има за цел, како што се наведува во образложените на наградата, да ги истражува европскиот идентитет и општествените предизвици, преку создавање простор за конструктивни дебати за теми релевантни за младите.

Првата награда што ја доби „Форум Еуропеум“ има и паричен надомест во износ од 7.500 евра.

Добитник на втората награда на конкурсот и чек од 5.000 евра е чешкиот проект „Благодарам што можеме да гласаме“, насочен кон поттикнување на поголемо учество на младите Чеси на возраст од 18 до 29 години на ланските избори за членови на Европскиот парламент.

Проектот имаше за цел да се бори против апатијата и перцепираната политичка неефикасност и за поттикнување на младинскиот ангажман преку едукација, соработка и иновативни напори за информирање.

Третата награда и паричен надомест од 2.500 евра ја доби германскиот проект „Феминистичка правна клиника“, насочен кон поддршка и правна помош на оние кои се најпогодени од дискриминација и насилство врз основа на полот – особено жените, лезбејките и интерсексуалните, небинарните, трансродовите, ародовите и квир лицата.

Европската младинска награда „Карло Велики“ се доделува за иницијативи на млади луѓе на возраст од 16 до 30 години насочени кон проекти за зајакнување на демократијата и за поддршка активно младинско учество.

Од нејзиното воспоставување во 2008 година, на конкурсите за наградата учествувале над 6.500 проекти од цела Европа.

Постапката за избор на лауреатите започнува со национални селекција, односно со избирање на по еден кандидат од секоја од земјите членки на ЕУ, по што конечните добитници ги избира европско жири.