За „Тајм“ личности на годината се архитектите на вешташката интелигенција

Списанието „Тајм“ ги прогласи „Архитектите на вештачката интелигенција“ за Личности на годината. Изданието ги истакна технолошките титани чии најсовремени достигнувања го менуваат човештвото.

Меѓу претприемачите именувани од изданието се Јенсен Хуанг од „Нвидиа“, Сем Алтман од „ОпенАИ“ и Елон Маск од „Х/АИ“, кои „го презедоа кормилото на историјата, развивајќи технологии и донесувајќи одлуки што го менуваат информацискиот пејзаж, климата и нашиот начин на живот“, се вели во списанието.

„Тие ја преобликуваа јавната политика, ги променија геополитичките соперништва и донесоа роботи во нашите домови. Вештачката интелигенција се појави како можеби најзначајната алатка во конкуренцијата меѓу големите сили од појавата на нуклеарното оружје“, оцени „Тајм“.

Една од двете насловни страници на списанието е реинтерпретација на иконската фотографија од 1932 година „Ручек на облакодер“, на која се прикажани градежни работници како ручаат на челични греди над Њујорк.

На илустрацијата на „Тајм“, покрај Маск, Хуанг, Алтман, се прикажани и Марк Цукерберг, извршната директорка на „АМД“, Лиса Су, како и шефот на вештачката интелигенција на „Гугл“, Демис Хасабис, Дарио Амодеи од „Антропик“ и професорот од „Стенфорд“, Феи-Феи Ли.

Според списанието, во сопственост на милијардерот од Силиконската долина, Марк Бениоф, 2025 година е годината кога вештачката интелигенција од ветувачка технологија станува реалност, при што употребата на ChatGPT се зголемила повеќе од двојно на 10% од светската популација.

„Тоа е највлијателната технологија на нашето време“, изјави Хуанг за „Тајм“, предвидувајќи дека вештачката интелигенција ќе ја зголеми глобалната економија од 100 трилиони долари на 500 трилиони долари.

Но, списанието, исто така, укажува на темната страна на вештачката интелигенција.

Оваа година имаше тужби во кои се тврди дека четботовите придонеле за самоубиства кај тинејџерите и кризи во менталното здравје, а заканата од губење на работни места расте бидејќи сè повеќе компании се тркаат да ги заменат своите работници со вештачка интелигенција.