Заеднички воени вежби на САД и Ерменија, незадоволство во Русија

Од денеска до 20 септември припадници на ерменската и американската армија одржуваат заеднички воени вежби во Ерменија.

Вежбата „Орел партнер 2023“ (Eagle Partner 2023) има за цел да го „подигне нивото на интероперабилност“ на американските и ерменските сили кои учествуваат во мировните операции. „Можеме да потврдиме дека церемонијата на отворање на вежбата започна“, изјави портпаролот на американската војска за Европа и Африка.

Според Вашингтон, „околу 85 американски војници ќе тренираат заедно со околу 175 ерменски војници“ во центрите за обука во близина на Ереван.

Москва со незадоволство гледа на овие вежби и во петокот го повика ерменскиот амбасадор да протестира против овие „непријателски мерки“. Шефот на руската дипломатија Сергеј Лавров вчера нагласи дека Русија не гледа „ништо добро во обидите на агресивна членка на НАТО да навлезе во Кавказот“. Сепак, тој изрази надеж дека „сојузничките активности“ меѓу двете земји „ќе надвладеат“.

Плановите на ерменските власти да одржат заедничка воена вежба со САД предизвикува загриженост, посебно во актуелната ситуација, изјави минатата недела портпаролот на Кремљ, Дмитриј Песков. Тој тогаш истакна дека Русија ги анализира информациите и ја следи ситуацијата.