Skip to content
Средбата на украинскиот претседател Володимир Зеленски со европските лидери заврши денеска во Лондон, во момент кога преговорите околу новиот мировен план за Украина влегуваат во чувствителна фаза. Зеленски претходно изјави дека разговорите со американските претставници биле „конструктивни, но не и едноставни“, укажувајќи на сложената позиција околу предложениот договор.
Во саботата украинскиот претседател се сретна со специјалниот пратеник на американскиот претседател Доналд Трамп, Стив Виткоф, како и со зетот на Трамп, Џаред Кушнер. Денешниот состанок во Лондон со лидерите на Франција, Обединетото Кралство и Германија се смета за клучен дел од европските консултации, по што ќе следат дополнителни разговори во Брисел.
Американскиот претседател Трамп го обвини Зеленски дека „сè уште го нема прочитано“ новиот предлог за мировен договор, додавајќи дека „не е сигурен дали украинскиот лидер ќе се согласи со понудата“. Зеленски, пак, порачува дека „американските претставници добро ги знаат основните украински позиции“, меѓу кои и условите кои Киев ги смета за неопходни за одржлив мир.
Украинскиот претседател по средбата истакна дека „иднината на Украина е иднината на Европа“, нагласувајќи дека континентот мора да остане единствен во поддршката на украинскиот суверенитет и безбедност.
Во меѓувреме, руските државни медиуми триумфално известуваат за наводната политичка предност на Трамп во процесот, претставувајќи го како лидер кој може „брзо да донесе мир“, во духот на долгогодишната кремљовска стратегија да се поткопа довербата во западната поддршка за Киев.
Разговорите продолжуваат со засилена дипломатска динамика во пресрет на новиот круг консултации во Брисел, кои ќе бидат клучни за тоа како Европа и САД ќе го усогласат својот пристап кон украинскиот мировен процес.
