Skip to content
Украинскиот претседател Володимир Зеленски ја нарече руската делегација што пристигна на мировните преговори во Турција „статисти“, алудирајќи дека тие се без вистинска улога и овластување, и дека реалната моќ за одлучување останува исклучиво во рацете на рускиот претседател Владимир Путин. Изјавата предизвика жестоки реакции од Москва, вклучително и навредлива реплика од портпаролката на руското МНР, Марија Захарова.
„Украина испрати делегација од високо ниво, подготвена да разговара за конкретни решенија“, соопшти Кабинетот на украинскиот претседател. „Русија, пак, испрати прилично нископрофилна делегација со нејасен мандат. За нас, тоа изгледа како уште една демонстрација на непочитување и неодговорност. За понатамошните чекори ќе известиме дополнително – консултациите со нашите партнери продолжуваат.“
Зеленски: „Без Путин, тоа се само статисти“
Зеленски порача дека Украина ќе пристапи сериозно кон преговорите само ако лично учествува Владимир Путин. „Сè додека рускиот претседател избегнува директен дијалог, делегациите што ги испраќа се ништо повеќе од статисти во театарска претстава“, рече тој.
Рускиот тим на преговорите беше предводен од претседателскиот советник Владимир Медински, кого многумина го сметаат за фигура без вистинско политичко влијание. Во делегацијата се наоѓаат и заменик министерот за одбрана Александар Фомин и шефот на руската воена разузнавачка служба ГРУ, Игор Костјуков.
Според украински извори, составот на руската делегација само го потврдува впечатокот дека Москва не е искрено заинтересирана за мир, туку сака да добие време или да создаде привид на дипломатска активност.
Захарова: „Зеленски е кловн, не аналитичар“
На изјавите на Зеленски остро реагираше портпаролката на руското Министерство за надворешни работи, Марија Захарова, која го навреди украинскиот претседател нарекувајќи го „кловн што мисли дека е аналитичар“, додавајќи дека „Москва нема намера да учествува во пропагандни спектакли за западна публика“.
Таа го обвини Киев дека е под влијание на странски центри на моќ и дека постојано поставува „неостварливи услови“ за каков било дипломатски напредок.
Турција се обидува да ја задржи улогата на посредник
Мировните преговори се одржаа во Истанбул, под покровителство на турскиот претседател Реџеп Таип Ердоган, кој веќе извесен период се обидува да игра улога на посредник помеѓу Киев и Москва. Украинската делегација моментално престојува во Анкара, каде што се одржуваат паралелни состаноци со турските власти и со претставници на меѓународната заедница.
Иако од преговорите сè уште нема конкретни резултати, дипломатските извори велат дека продолжувањето на дијалогот – и покрај навредите – е барем знак дека двете страни не ја исклучуваат целосно можноста за политичко решение.
